Die filmweergawe van die bekroonde 2017-teaterproduksie is ’n unieke ervaring en eerder as om dit op die verhoog te skiet is die produksie in ’n plaasstal by die Worcester Museum (Kleinplasie) verfilm. Dit sorg vir ’n unieke film-ervaring van die verhoogproduksie. 

Een donker, stormagtige aand gedurende die laaste bitter dae van die Suid-Afrikaanse oorlog, in ’n uitgebrande skuur van ’n plaas, lê ’n gewonde Boeregeneraal wat deur Anna, ’n kruiedokter van uitsonderlike magte versorg moet word. Haar aantreklike, maar bloedlose dogter, Annie, is ook besig om te veg vir haar lewe, maar het veel meer as haar ma se konkoksies nodig. Die generaal se dapper en getroue adjudant, gebrei deur die slagveld en die afgryse van oorlog, staan nou voor ’n verskriklike keuse en ’n nuwe onnoembare gevaar. In ’n wêreld waar mans, in die naam van patriotisme lewens en landskappe vernietig, moet vroue meer subtiele en misterieuse metodes ontwikkel om te oorleef. De Wet verweef digterlik en kragtig ’n verhaal van liefde in ’n tyd van vernietiging, wat die alledaagse omskep in die uitsonderlike. Reza de Wet is nege jaar gelede op 27 Januarie 2012 oorlede. Hierdie is ’n huldigingsproduksie aan een van Suid-Afrika se belangrikste en mees invloedryke toneelskrywers.