DIE BURGER

KKNK-2017-sponsors-web-Borgeboodskappe-fotos-250x250-DieBurger

Die Burger en die Klein Karoo Nasionale Kunstefees (KKNK) stap al sedert die fees se beginjaar die pad saam. Ons is trots hierop, want daar is belangrike raakpunte in die onderskeie take van die fees en van die koerant.

 

Saam is ons storievertellers, en net soos wat dit nie alleen die rol van Die Burger is om in te lig nie, is dit nie alleen die rol van die KKNK om te vermaak nie. Ons het albei die breër rol van maatskaplike en politieke kommentators. As sulks is ons belangrike stemme in die nasionale gesprek waarin Die Burger én die KKNK die spieël ophou om die wêreld, maar ook ons mense se plek daarin, krities te kan betrag.

 

Juis in ’n tyd van ons land se geskiedenis waar ons politieke leiers te dikwels nie daarin slaag om die trant van ons nasionale gesprek gesond te hou nie, deel die fees en die koerant die gemeenskaplike taak om ’n bymekaarkomplek te wees waar mense uit verskillende gemeenskappe mekaar kan verryk en waar nuwe moontlikhede verbeel kan word.

Wat die nasionale dialoog betref, is die puik produksies en lewendige debat in openbare gesprekke jaarliks nóg ’n aanduiding van die suurdeeg-effek wat die fees het.

 

In onstuimige politieke, maatskaplike en ekonomiese tye – soos wat die land tans weer beleef – is die neiging dikwels onder die magshebbers om alternatiewe stemme en gesigspunte te wil smoor. Maar Soos Alida Kok, politieke wetenskaplike, deelnemer aan die gesprekreeks en rubriekskrywer van Die Burger, dit met verlede jaar se fees netjies gestel het: “As mense swyg, word despotiese mag genormaliseer… So, ondersteun ons kunste, dink krities, neem deel aan gesprekke, vind alternatiewe maniere om toegang te skep tot die hulpbronne wat ons benodig om te leef, en hernu só die uitvoerende gesag.”

 

Geluk dus met ’n puik program. En tweedens, geluk met die wyse waarop die fees oor en oor bewys dat Afrikaans jou nie diskwalifiseer om deel van die nasionale debat te wees nie.

Kom loer in by Media24 se Feeskafee en gesels saam!

 

Willem Jordaan

Redakteur: Die Burger

CONTACT US

We're not around right now. But you can send us an email and we'll get back to you, asap.

Sending

© 2018 KKNK. Alle Regte Voorbehou. Digitale Projekbestuur deur Lumico.

Log in with your credentials

Forgot your details?